Aktivitet në përkujtim të Figurës Profetike në Shkodër - 17.1.2014

Komuniteti Mysliman (Myftinia Shkodër) organizoi një aktivitet fetar e kulturor në teatrin “Migjeni”, në përkujtim të Lindjes së begatë të Hz. Muhamedit (a.s).

Aktiviteti nisi me shfaqjen e filmit më të ri të prodhuar nga Komuniteti Mysliman i Shqipërisë, në lidhje me dërgesën profetike dhe misionin global me të cilin Hz. Muhamedi (a.s) u dërgua.

H. Bujar Spahiu, nënkryetar i Komunitetit Mysliman të Shqipërisë, në fjalën e tij, u përqendrua te rëndësia e dërgesës profetike dhe vlera e madhe e traditave profetike, si një udhëzim i përhershëm për brezat myslimanë dhe njerëzimin.

Ndërsa Myftiu i Shkodrës, Imam Muhamed Sytari, iu drejtua me disa fjalë të ngrohta, plot prekje malli e dashurie, Profetit Muhamed (a.s), duke e mbyllur fjalën e tij me një salavat, që u shoqërua nga krejt të pranishmit.

Aktiviteti i organizuar më 15 Janar është pasuruar me ilahitë dhe salavatet e kënduara nga grupi i ilahive i Universitetit BEDËR, nën drejtimin e Davud Aktepe.